tag

طيب.. تاج كمان من كريم.. كسرًا للصمت وللملل :)

أحب شخص لقلبك فى الدنيا؟

ممممم.. امى والواد على.. وجدى الله يرحمه.. وناس كتير بس دول اللى نطوا ف دماغى الاول

انسان مستعد تضحي بحياتك – ركز فى كلمة حياتك - عشانه؟

الواد على برده.. قد ايه هو صغير وعبيط و ميعرفش يدافع عن نفسه حتى قدام نمله عبيطه زيه.. تحس ان ممكن تعمله وتديله اى حاجه بس عشان ميتأذيش حتى لو حياتك.. انا جبانه اوى معاه وبخاف عليه من حاجات عبيطه اوى.. مش عارفه حعمل ايه مع عيالى انا شخصيا

:))

انسان كرهته لدرجة الجنون و تمنيت لو تمسك سكينة وتنقض عليه وتغرزها فى قلبه تقتله وتقف تبص لجثته وتشفي غليل قلبك؟

كان نفسى اقول ما فيش بس اكيد فيه للأسف وحبه حلوين يعنى.. مش لازم ذكر

اسماء ;)

ما هو اسم أجمل كتاب كتبه بشر قرأته ومحتفظ به حتى الان؟ انت متعلق بيه

وبتقرأه كل فترة؟

حاجات كتير.. صلاح جاهين اكتر حاجه.. الحب فى المنفى بهاء طاهر , كائن لا تحتمل خفته ميلان كونديرا بقى من الكتب المفضله برده, امل دنقل؛ النبى جبران خليل جبران؛ قصتين قصيرتين من كتاب قصصى للمخزنجى اسمه اوتار الماء (تلك الحياه الفاتنه و شرفه العطور)

اهم جهاز منزلى انت متعلق بيه او بتستخدمه كتير؟

الكمبيوتر.. بحسه واحد من العيله :))

شىء تحس بالراحة النفسية عندما تنظر اليه؟

بحر اسكندرية.. ممكن مساحه خضرا ما فيهاش اى ورد تانى ولا اى لون غير

الابيض

daisy flower وبس

مكان تحس فيه بالحنين الى شىء لا تدرى ماهو و ذكريات جارفة الى لاشىء؟

البحر طبعا برده.. الانفوشى خصوصًا.. بحرى..

اجمل مدينة زرتها داخل مصر؟

مبزورهاش انا فيها :) اسكندرية طبـعًا.. بجد مش تحيز بس ما فيش احلى منها

أجمل مكان طبيعي رأيته داخل مصر؟

سيــــــــــوة.. واحشانى يا سيوة

شخصية كارتونية بتحبها؟

pink panther

.. حلو كده وطيب وبمبى وحياته كلها بمبى.. ما فيش ابعاد.. حياه مريحه وبمبى اوى :)

نوع هاتفك المحمول؟

نعم!!

سرعة بروسيسور جهازك؟

ده يهم مين فى ايه؟؟

حجم ذاكرة –هارد- جهازك؟

برده يعنى!!

المساحة التى تشغلها المواد الاسلامية على جهازك؟

مبيتسمعش ولا بيتشاف منهم حاجه.. حنضحك على بعض!!0 G يا فرحتى ب 80

نفس المساحة السالف ذكرها فى قلبك-الاجابة لنفسك عشان الرياء يا اخواننا-؟

اللى فى القلب فى القلب .. بلاش هبل

أهم هدف انت واضعه لحياتك دلوئتى؟

الاقينى

مواصفات فتاة الأحلام بالنسبة لك؟

اكيد قصدك رجل احلامك :) احس انه بتاعى.. سكنى

صف ما يأتى شعورك لما بتسمع كلمة مصر؟

خوف.. عليها ومنها

شعورك لما بتسمع كلام عن اليهود؟

انا مع كريم. يهودى غير اسرائيلى.. بس.. ما هو كله بيدبح ف كله.. الكره والقرف متوزع على كله.. بس غالبا الاسرائيلى بيحسسنى بالقرف اكتر

شعورك لما بتشوف ظابط شرطة؟

احساس بالظلم والقرف

لون البطانية اللى بتتغطى بيها فى الشتاء؟

طيب

لون الجورب-الشراب- المفضل لديك؟

طيب

افكارك تجاه شاب ماشى فى الطريق يلبس جلابية بيضاء قصيرة وعمامة وله لحية وبجيبه السواك وبيده المصحف؟

يارب الجوه يبقى زى اللى بره

احساس يراودك فى اشارة مرور مغلقة بسبب مسئول كبير؟

كره- قرف- احساس ان يا رب الارض تتشق و تبلعنا كلنا و نخلص بقى

مين اكتر ست اشخاص بتحبهم ؟؟؟

ماما

جدى الله يرحمه

على

اخواتى و بسنت بنت خالتى

اصحابى شذا و هديل و طارق.. وناس تانيه كده :)

- حُجبت.. الى ان يقضى الله امرا كان مفعولا

هل أنت سعيد؟

السعادة دى موود بتورح وتيجى .. الثابت الضيق والحزن و العادى حاليا انا عادى.. لا فرح و لا حزن.. ومش متضايقه

مستنيه نوبه الفرح الجايه

:)
لو اجتمعت مع حسنى مبارك فى مكان واحد هتعمل ايه ؟

حموت من الضحك

لو معايا مليون ونص أعمل ايه ؟

افتح مصنع لعمل العرايس.. العرايس تصميمى واجيب ناس تعملها.. ماركه مويا :)

وجاليرى لبيع العرايس و شغل اصحابى... اللى عايز يعنى :))

بتحب مصر ؟

و اكرهها والعن اوبها بعشق زى الداء

أنت مسلم ؟

اجل

ليه ؟

ليه ايه بالظبط؟

مين أكتر شخصية متقدرش تستغنى عنها ؟

امى

ايه أكتر موقف محرج؟

لا مش فاكره موقف معين
الأمنية اللى اتمنى تحقيقها؟

عصايا سحريه, اكون شخصيه كارتونيه